క్వార్టర్ ఫైనల్లోకి సైనా నెహ్వాల్

హైదరాబాద్: భారత నెంబర్ వన్ బాడ్మింటన్ క్రీడాకారిణి సైనా నెహ్వాల్ హైదరాబాదులో జరుగుతున్న ప్రపంచ చాంపియన్ షిప్ టోర్నీలో క్వార్టర్ ఫైనల్లోకి ప్రవేశించింది. ప్రపంచ చాంపియన్ షిప్ లో ఈ ఘనత సాధించిన తొలి భారత మహిళగా ఆమె రికార్డు సృష్టించింది. ప్రీ క్వార్టర్ ఫైనల్లో ఆమె బల్గేరియాకు చెందిన పెత్యా నెదెల్చెవాను 18-21, 21-18, 21-10 స్కోరుతో ఓడించింది. ఈ మ్యాచ్ 57 నిమిషాల పాటు హోరాహోరీగా సాగింది.

శుక్రవారం సైనా నెహ్వాల్ క్వార్టర్ ఫైనల్లో చైనాకు చెందిన లిన్ వాంగ్ ను ఎదుర్కుంటుంది. బుధవారం ప్రొకఫెంకోతో మ్యాచ్ లో సైనా ఆటను చూసిన పెత్యా పక్కా ప్లాన్ తో ఆటలోకి అడుగుపెట్టింది. సైనా స్మాష్ లతో విరుచుకుపడినా బెదరకుండా పెత్యా సైనాను ఎక్కువ సేపు అడించి అలసిపోయేలా చేసేందుకు ప్రయత్నించింది. ఈ స్థితిలో తొలి సెట్ గెలుచుకుంది. ఆ తర్వాత సైనా తన ఆటకు పదును పెట్టింది. దీంతో పెత్యా వెనక్కి తగ్గక తప్పలేదు.