చైనా మాస్టర్స్ సూపర్ సిరీస్ నుంచి సైనా అవుట్

న్యూఢిల్లీ: హైదరాబాద్ స్టార్ బ్యాడ్మింటన్ క్రీడాకారిణి సైనా నెహ్వాల్ చైనా మాస్టర్స్ సూపర్ సిరీస్ నుంచి అవుటైంది. శుక్రవారం జరిగిన మహిళా సింగిల్స్ క్వార్టర్ ఫైనల్స్‌లో టాప్ సీడ్ చైనా క్రీడాకారిణి యిహాన్ వాంగ్ చేతిలో సైనా ఓటమి పాలైంది. సైనా వాంగ్ చేతిలో 8-12, 12-21 స్కోరుతో పరాజయం పాలైంది. వాంగ్ చేతిలో కేవలం 33 నిమిషాల వ్యవధిలోనే సైనా ఓటమి పాలైంది.

భారత నెంబర్‌వన్ బ్యాడ్మింటన్ క్రీడాకారిణి సైనా నెహ్వాల్ చైనా మాస్టర్స్ సూపర్ సిరీస్‌లో గురువారం జరిగిన మహిళల సింగిల్స్ ప్రిక్వార్టర్స్‌లో ఐదోసీడ్ సైనా 21-11, 18-21, 27-25తో అయేని కురిహరే (జపాన్)పై విజయం సాధించింది. తద్వారా క్వార్టర్‌ఫైనల్లోకి ప్రవేశించింది. ఈ మ్యాచ్ గంటా 12 నిమిషాల పాటు హోరాహోరీగా సాగింది. తొలిగేమ్‌లో ప్రత్యర్థికి ఎలాంటి అవకాశం ఇవ్వకుండా ఈ హైదరాబాదీ స్టార్ చెలరేగింది. కానీ రెండోసెట్‌లో తడబడింది. అయితే చివరికి విజయాన్ని దక్కించుకుంది. క్వార్టర్ ఫైనల్‌లో మాత్రం ఓటమి చవిచూడక తప్పలేదు.