కామన్వెల్త్ గేమ్స్‌లో అదరగొట్టిన అమలాపురం ఆటగాడు

తల్లిదండ్రులు ఇద్దరూ టీచర్లే:

సాత్విక్ సాయిరాజ్ తల్లితండ్రులు ఇద్దరూ ఉపాధ్యాయులే. తండ్రి కాశీవిశ్వనాథం ఫిజికల్ ఎడ్యుకేషన్ టీచర్‌గా పనిచేసి ఇటీవలే ఉద్యోగ విరమణ చేశారు. తల్లి రంగమణి ప్రస్తుతం స్కూల్‌ అసిస్టెంట్‌గా పనిచేస్తున్నారు. ఆయన సోదరుడు అమెరికాలో సాఫ్ట్‌వేర్‌ ఇంజినీర్‌గా స్థిరపడ్డారు.

అంతర్జాతీయ స్థాయిలో ఎన్నో విజయాలు

కామన్‌వెల్త్‌ క్రీడల్లో దేశం తరఫున పాల్గొన్న సాత్విక్‌ గతంలో జాతీయ, అంతర్జాతీయ స్థాయిలో ఎన్నో విజయాలు సాధించారు. 2015లో ఏషియన్‌ బ్యాడ్మింటన్‌ ఛాంపియన్‌షిప్‌ జూనియర్‌ డబుల్స్‌ విభాగంలో విజేతగా నిలిచారు. బంగ్లాదేశ్‌ ఛాలెంజ్‌ టోర్నమెంట్‌, వియత్నాం ఛాలెంజ్‌ టోర్నమెంట్, ఇంగ్లాండ్‌ ఛాంపియన్‌ టోర్నమెంట్‌లోనూ సాత్విక్ తన సత్తాచాటాడు. అనేక టోర్నీల్లోనూ విజేతగా నిలిచి బంగారు పతకాలను సాధించారు.

అమలాపురంలో సంబరాలు

కామన్వెల్త్ క్రీడల్లో సాత్విక్ సాధించిన విజయంతో సొంతూరు అమలాపురంలో సంబరాలు అంబరాన్ని తాకాయి. దేశం తరఫున ఆడి బంగారు పతకం సాధించడంపై స్థానికులు సంతోషం వ్యక్తం చేస్తున్నారు. కోనసీమ ఐకాసా ఆధ్వర్యంలో సోమవారం రాత్రి ప్రత్యేక అభినందన కార్యక్రమం ఏర్పాటుచేసి మిఠాయిలు పంచారు.

అశ్వని పొన్నప్పతో జోడీ కట్టిన సాత్విక్

మిక్స్‌డ్ డబుల్స్‌లో అశ్వని పొన్నప్పతో జోడీ కట్టిన సాత్విక్ మలేసియాకు చెందిన పెంగ్ సూన్-లి యింగ్ హో ద్వయంపై 21-14, 15- 21, 21- 15తో గెలిచి భారత్‌కు శుభారంభాన్ని ఇచ్చారు. ఇక పురుషుల సింగిల్స్‌లో కిదాంబి శ్రీకాంత్ మూడు సార్లు ఒలింపిక్ రజత పతక విజేత లీ చాంగ్ వీని ఓడించాడు. మహిళ సింగిల్స్‌లో సోనియా చెయాను 21-11, 19- 21, 21- 8 తో సైనా నెహ్వాల్ మట్టికరిపించింది. దీంతో భారత్ స్వర్ణం గెలుపొందింది.