సింధుని కొడితే అక్క ఏడ్చేది, మోకాళ్ల నొప్పులన్నా వినని గోపీచంద్

హైదరాబాద్: రియోలో రజతం సాధించిన పీవీ సింధుకు హైదరాబాదులో ఘనంగా స్వాగతం పలకనున్నారు. సింధు సోమవారం ఉదయం 8.30 గంటలకు శంషాబాద్ విమానాశ్రయానికి చేరుకుంటుంది. ఆమెను ఘనంగా స్వాగతించేందుకు జీహెచ్ఎంసీ భారీ సన్నాహాలు చేస్తోంది.

అత్తాపూర్, లంగర్ హౌజ్, మెహిదీపట్నం మీదుగా ఓపెన్ టాప్ జీపులో వస్తారు. ఆ తర్వాత ముఖ్యమంత్రి కల్వకుంట్ల చంద్రశేఖర రావు ఆమెను సత్కరించనున్నారు. ఆ తర్వాత ఆమె మధ్యాహ్నం పదకొండున్నర గంటలకు గోపీచంద్ అకాడమీ చేరుకుంటుంది. పన్నెండు గంటలకు ఆమె మీడియాతో మాట్లాడుతుంది. ప్రధాన కూడళ్లలో సింధు పైన పూల వర్షం కురిపిస్తారు.

సింధుకు ఘనస్వాగతం పలకాలని ముఖ్యమంత్రి కేసీఆర్‌ అధ్యక్షతన శనివారం సచివాలయంలో జరిగిన మంత్రిమండలి సమావేశంలో భారీ నజరానాల ప్రకటనతోపాటు ఘన స్వాగతం నిర్ణయం తీసుకున్నారు. ఆ తర్వాత కేసీఆర్ విలేకరులతో మాట్లాడారు.

తెలంగాణ బిడ్డ అయిన పీవీ సింధు గొప్ప విజయాన్ని సాధించి రాష్ట్రంతో పాటు దేశానికి గర్వకారణంగా నిలిచిందని అన్నారు. తెలంగాణ ప్రభుత్వం ఆది నుంచి క్రీడాకారులను ప్రోత్సహిస్తోందని, గతంలో సానియా మీర్జాకు రూ.కోటి సాయం అందించామని, తద్వారా అత్యుత్తమ శిక్షణ పొంది ఆమె వరుసగా 30 విజయాలను సాధించిందని సీఎం చెప్పారు.

గతంలో సింధు కూడా ఆర్థిక సాయం కోరగా ఆమెకు రూ. 40 లక్షలను, కోచ్‌కు రూ.50 లక్షలను ఇచ్చామన్నారు. సింధు ప్రతిభగల క్రీడాకారిణి అని, ఆమెకు ఉజ్వల భవిష్యత్తు ఉందని తెలిపారు. భవిష్యత్‌లో ఆ అమ్మాయి ఎదగటానికి ప్రభుత్వ పక్షాన ప్రోత్సహిస్తామన్నారు.

అకాడమీని నిర్వహిస్తూ ప్రపంచ స్థాయిలో క్రీడాకారులను తయారు చేస్తున్నారని గోపీచంద్‌ను కొనియాడారు. ప్రపంచంలోని 50 మంది ఉత్తమ క్రీడాకారుల్లో ఏడుగురు ఆయన తయారు చేసిన వారే అన్నారు. అందుకే ఆ అకాడమీకి సాయం అందించాలని నిర్ణయించామన్నారు. ఈసారి ఒలింపిక్స్‌లో మహిళలదే హవా నడుస్తోందని, ఇప్పటిదాకా మన దేశానికి మహిళలే పతకాలు తెచ్చారని, ఇది చాలా సంతోషించాల్సిన విషయమన్నారు.

పీవీ సింధును కొడితే అక్క ఏడ్చేది

రియో ఒలింపిక్స్ 2016లో బ్యాడ్మింటన్‌లో రజతం గెలిచిన పీవీ సింధుకు తన అక్క అంటే చాలా ఇష్టమని ఆమె తల్లిదండ్రులు చెప్పారు. అలాగే, అక్కకు చెల్లి అంటే ఇష్టమన్నారు. చిన్నప్పుడు సింధును చదువుకోమని కొడితే వాళ్లక్క దివ్య ఏడిచేదన్నారు.

గోపీచంద్ తీసుకునే ఆహారం..

గోపీచంద్ ఏ ఆహారమైనా తీసుకుంటాడని, వివిధ దేశాల్లో పర్యటిస్తుంటారని, కాబట్టి అన్ని రకాల పుడ్ తినగలుగుతారని ఆయన భార్య అన్నారు. అలాగే, ఏమీ తినకుండా కూడా ఉండగలరన్నారు.

పీవీ సింధు పైన గోపీచంద్ భార్య

పీవీ సింధు చాలా స్వీట్ అమ్మాయని, అందరితో బాగుంటుందని కోచ్ గోపీచంద్ సతీమణి చెప్పారు. సింధు యాటిట్యూడ్‌ను గోపీచంద్ బాగా ఇష్టపడతారన్నారు.

మోకాళ్ల నొప్పులన్నా...

రియోకు నాలుగు నెలల ముందు నుంచి హైడ్రేడ్ పుట్స్ మానేయాలని సింధుకు గోపీచంద్ సూచించారని సింధు తల్లిదండ్రులు చెప్పారు. మోకాళ్ల నొప్పులు వస్తున్నాయన్నా ప్రాక్టీస్ కొనసాగాలని చెప్పారన్నారు.

29న ఖేల్ రత్న, 28న సచిన్ చేతుల మీదుగా కారు

ఈ నెల 28వ తేదీన మాస్టర్ బ్లాస్టర్ సచిన్ టెండుల్కర్ చేతుల మీదుగా పీవీ సింధుకు చాముండేశ్వరినాథ్ కారు ఇప్పించనున్నారు. అలాగే, 29న ఢిల్లీలో ఖేల్ రత్న అందుకోనుంది. కాగా, సల్మాన్ ఖాన్.. పీవీ సింధుతో గతంలో దిగిన ఫోటోను సోషల్ మీడియాలో పెట్టారు.