డెన్మార్క్‌ ఓపెన్‌: టైటిల్‌కు అడుగు దూరంలో సైనా, శ్రీకాంత్‌ ఇంటికి

ఫైనల్లో తై జు యింగ్‌ రూపంలో సైనా సత్తాకు అసలు పరీక్ష

టోర్నీ భాగంగా తొలి మ్యాచ్‌ నుంచి కాబోయే భర్త పారుపల్లి కశ్యప్, కోచ్‌ సియాదత్‌ కోర్టు పక్కనే ఉంటూ సైనాకు సలహాలు ఇస్తున్నారు. తొలి మ్యాచ్‌లో రెండు మ్యాచ్‌ పాయింట్లను కాచుకొని గెలిచిన సైనా ఆ తర్వాతి మ్యాచ్‌ల్లో రెండో సీడ్‌ అకానె యామగుచి (జపాన్‌)పై, ఎనిమిదో సీడ్‌ ఒకుహారాపై గెలిచింది. అయితే ఫైనల్లో తై జు యింగ్‌ రూపంలో సైనా సత్తాకు అసలు పరీక్ష ఎదురుకానుంది.

తై జు యింగ్‌పై గెలిచి సైనాకు ఐదేళ్లు

తై జు యింగ్‌పై గెలిచి సైనాకు ఐదేళ్లు దాటింది. ఇప్పటివరకు వీరిద్దరు 17 సార్లు తలపడగా తై జు యింగ్‌ 12 మ్యాచ్‌ల్లో సైనా 5 మ్యాచ్‌ల్లో గెలిచారు. 2013 స్విస్‌ ఓపెన్‌ క్వార్టర్‌ ఫైనల్లో తై జు యింగ్‌పై గెలిచిన తర్వాత ఆమెతో ఆడిన గత పది మ్యాచ్‌ల్లో సైనా ఓడిపోయింది. ఇక, ఈ ఏడాది తై జు యింగ్‌తో ఆడిన నాలుగు మ్యాచ్‌ల్లోనూ సైనా ఓటమిపాలైంది.

కిదాంబి శ్రీకాంత్‌ ఇంటికి

సైనా ఫైనల్‌లో అడుగుపెట్టగా, మరో స్టార్ ఆటగాడు కిదాంబి శ్రీకాంత్‌.. ప్రపంచ నంబర్‌ వన్‌, జపాన్ షట్లర్ కెంటో మొమోటా చేతిలో ఓటమి పాలయ్యాడు. పురుషుల సింగిల్స్‌ సెమీఫైనల్లో ప్రపంచ ఆరో ర్యాంకర్‌ శ్రీకాంత్‌ 16-21, 12-21 స్కోరుతో నెంబర్‌ వన్‌ ర్యాంకర్‌ కెంటో మొమొటా (జపాన్‌) చేతిలో వరుస గేముల్లో కంగుతిన్నాడు. 42 నిమిషాలు పాటు సాగిన ఈ మ్యాచ్‌లో శ్రీకాంత్ తుదికంటా పోరాడాడు.

కిదాంబి శ్రీకాంత్‌పై పూర్తి ఆధిక్యం

కెంటో... కిదాంబి శ్రీకాంత్‌పై పూర్తి ఆధిక్యాన్ని ప్రదర్శించాడు. శ్రీకాంత్ చేసిన తప్పిదాలను కెంటో విజయవంతంగా ఉపయోగించుకున్నాడు. కెంటో, శ్రీకాంత్‌ ఇప్పటివరకు ఎనిమిది మ్యాచు‌ల్లో తలపడగా కెంటో ఐదుసార్లు పైచేయి సాధించాడు. మహిళల డబుల్స్‌ క్వార్టర్‌ఫైనల్లో సిక్కిరెడ్డి-అశ్వినీ పొన్పప్ప జోడీ 14-21, 12-21 స్కోరుతో టాప్‌సీడ్‌ యూకి ఫుకుషిమ-సయాక హిరోట (జపాన్‌) చేతిలో ఓడిపోయింది.