పరువుపాయే!: ఢిల్లీ కాలుష్యం భరించలేక తప్పుకున్న స్టార్ ప్లేయర్!!

ఢిల్లీలో విపరీతంగా పెరిగిపోయిన వాయు కాలుష్యం, క్రీడా ప్రాంగణాల్లోని అపరిశుభ్రత ఇప్పుడు అంతర్జాతీయ బ్యాడ్మింటన్ వర్గాల్లో తీవ్ర చర్చకు దారితీసింది. దీనివల్ల ప్రపంచ నంబర్-2 ఆటగాడు ఆండర్స్ ఆంటోన్సెన్ ఏకంగా టోర్నమెంట్ నుంచి తప్పుకోవడం సంచలనం సృష్టించింది. డెన్మార్క్ స్టార్ బ్యాడ్మింటన్ క్రీడాకారుడు ఆండర్స్ ఆంటోన్సెన్ వరుసగా మూడో ఏడాది 'ఇండియా ఓపెన్' నుంచి తప్పుకుంటున్నట్లు ప్రకటించాడు.

ఢిల్లీలోని గాలి నాణ్యత అత్యంత దారుణంగా ఉందని, ఇక్కడ ఆడటం తన ఆరోగ్యానికి క్షేమకరం కాదని అతను సోషల్ మీడియాలో పేర్కొన్నాడు. టోర్నమెంట్ నుంచి అర్ధాంతరంగా తప్పుకున్నందుకు బ్యాడ్మింటన్ వరల్డ్ ఫెడరేషన్ అతనికి 5000 అమెరికన్ డాలర్ల (సుమారు రూ. 4.15 లక్షలు) జరిమానా విధించింది. ఆరోగ్యం కంటే డబ్బు ముఖ్యం కాదని ఆంటోన్సెన్ ఆవేదన వ్యక్తం చేశాడు.

అపరిశుభ్రతపై మరిన్ని ఫిర్యాదులు
మరో డెన్మార్క్ క్రీడాకారిణి మియా బ్లిచ్‌ఫెల్డ్ కూడా ఢిల్లీలోని ఇందిరాగాంధీ ఇండోర్ స్టేడియంపై తీవ్ర విమర్శలు చేశారు. వార్మప్ ఏరియాల్లో పావురాల రెట్టలు పడి ఉన్నాయని, కోర్టు లోపల విపరీతమైన ధూళి, చలి ఉందని ఆమె ఫిర్యాదు చేసింది. ఇటువంటి అపరిశుభ్రమైన ప్రదేశాల్లో ప్రాక్టీస్ చేయడం క్రీడాకారుల ఆరోగ్యానికి ముప్పు అని ఆమె పేర్కొంది.

భారత బ్యాడ్మింటన్ అసోసియేషన్ వివరణ
ఈ విమర్శలపై భారత బ్యాడ్మింటన్ అసోసియేషన్ స్పందించింది. ప్రధాన స్టేడియం పూర్తిగా శుభ్రంగా ఉందని, పావురాల సమస్య లేదని స్పష్టం చేసింది. ఆటగాళ్ల ఫిర్యాదులు పాత కేడీ జాదవ్ స్టేడియం గురించి అయి ఉండొచ్చని, ప్రధాన వేదిక గురించి కాదని తెలిపింది.

ప్రపంచ ఛాంపియన్‌షిప్ 2026పై ఆందోళన
ఈ ఏడాది చివరలో భారత్ అత్యంత ప్రతిష్టాత్మకమైన ప్రపంచ బ్యాడ్మింటన్ ఛాంపియన్‌షిప్‌కు ఆతిథ్యం ఇవ్వనుంది. ఈ లోపే అంతర్జాతీయ ఆటగాళ్లు ఇక్కడి సౌకర్యాలపై అసంతృప్తి వ్యక్తం చేయడం ఆందోళన కలిగిస్తోంది. ఢిల్లీ కాలుష్యం, నిర్వహణ లోపాల వల్ల దేశ ప్రతిష్ట దెబ్బతినే అవకాశం ఉందని క్రీడా విశ్లేషకులు భావిస్తున్నారు.